保育珊瑚礁!4個旅遊景點禁用防曬品

來源justamazingimages @Tumblr


好多人夏天都鍾意進行戶外活動!不過玩時玩,貪靚嘅女士為咗怕曬黑,都會做好兩手準備,其中塗一層厚厚嘅太陽油就真係「重中之重」。可惜,呢類嘅防曬用品往往加咗化學成分,融入水內仲會剝奪珊瑚礁嘅養分,影響整個海洋生態。所以未來嘅1-2年,部分地方都禁止使用某些防曬乳,去旅行嘅朋友記得留意清楚,同時為保護地球出一分力!

1.帛琉

帛琉係潛水聖地,當中嘅世界遺產水母湖,每年都吸引唔少人朝聖。不過,隨住當地觀光客越來越多,當地生態嚴重受到破壞。帛琉政府為以防珊瑚礁遭到毒害,率先喺2020年起將禁止遊人使用化學物防曬乳。遊客一經發現攜帶相關防曬乳入境,將被沒收。而進口或售賣遭禁用的化學物防曬乳,仲會被罰款7800港元,所以千萬唔好以身試法!

2.夏威夷

夏威夷係享受陽光與海灘嘅地方,但有研究人員就發現,當地嘅珊瑚礁含有大量嘅二苯甲酮同甲氧基肉桂酸辛酯。所以,2021年起夏威夷將禁售含有這2種化學物質嘅防曬乳產品,等大家享受大自然嘅同時,都學會保護海洋生物。

3.西礁島

除咗夏威夷之外,西礁島於2021年同樣禁止售賣含有二苯甲酮 (Oxybenzone)與甲氧基肉桂酸辛酯(Octinoxate)嘅防曬產品。雖然當地市議員都提到防曬用品污染海洋並不是失去珊瑚礁的主因,但仍然想做點事去減少化學物進入海洋。

4. 墨西哥

墨西哥並唔係全面禁用,不過部分景點就要求使用沒有污染嘅防曬及護膚產品。例如,水上公園Xel Ha、Xcaret Park則要展示所用嘅防曬產品,不合格就會被收走!喺天坑下水前仲要先淋浴,以確保海洋生物安全。