【兩日一夜】九州福岡郊外 太宰府、柳川散策

【兩日一夜】九州福岡郊外-太宰府、柳川散策

九州係唔少香港人近年愛上嘅地方,除咗因為多咗直航機,更因為九州福岡為南部最大城市,既有東京嘅感覺,但又有唔少郊外地方可以等大家發掘。而且好多人去九州都係自駕遊,要去郊外非常方便。福岡郊外景點有唔少選擇,今日就介紹最經典,可以話去福岡必到嘅柳川同太宰府兩日遊!

Day 1

早上:柳川觀光列車 

柳川,顧名思義就係水都之意思,要前往柳川,最直接方法係於福岡乘坐觀光列車「水都號」。與一般日本觀光列車相同,列車有6卡車廂,各有不同主題,例如「柳樹新綠與流水」、「枸橘花」、「花火與白秋祭的遊船」等;列車上仲有展示柳川初代藩主立花宗茂嘅文物,尤如一個移動博物館。最方便係列車無需預約,即場去到買飛就搭得,一日有好多班次,時間表:請按此。 

由福岡直接往來柳川,無需預約,一日有眾多班次。
唔同車廂有唔同造型及主題。
連列車車票都好有紀念價值,各有不同款式。


「水都號」觀光列車

詳情:請按此


中午:乘柳川小船看小鎮

柳川最出名因為當中有一條小河,兩旁都係柳樹,非常浪漫。去到柳川每位遊客必定要做就係乘坐小船,由船伕一邊拉船,一邊唱歌,極具特色,全程約70分鐘嘅船程,除咗岸邊柳樹之外,亦可以睇到無數古蹟及文物,當中包括12座大小不一嘅橋,有啲仲窄到只係容得下一隻小船僅僅通過,好考船伕功力。唔少小船上更加安置咗日式暖爐,可以放對腳入去取暖,冬天都可以暖笠笠咁享受坐船樂!

柳川兩邊都係柳樹,四季各有不同景色。
於櫻花季節更有櫻花可以睇,構成完美明信片!
經過12條大小不一嘅橋,穿過橋底。


柳川小船

地點:西鐵柳川站之松月乘船場

價錢:大人為1,500日圓(約港幣$106)

資料:按這裡


晚餐:舉國聞名 柳川鰻魚飯

去柳川要坐船,第二樣一定要做就係食鰻魚飯!不過柳川沿岸都係唔同鰻魚飯店,點揀先好?如果第一定嚟,請一定要食「若松屋」。從遠遠望到呢間古式日本建築已經聞到當中香味,雖然要排隊,不過可以留低名登記唔使企定定,尚算貼心。柳川鰻魚飯屬於關西做法,直接放鰻魚於炭火上烤熟,重覆翻烤淋上秘製醬汁,超鬆軟細膩,甜中帶鹹,有咬感,難怪成為柳川百年第一!

極為傳統風味製作鰻魚飯,成為經典。
古舊日式建築,從遠遠傳出香味。
關西鰻魚飯嘅做法,直接放於炭火上烤。


若松屋

地址:柳川市沖端町26

營業時間:11AM至8PM(逢星期三休息、每月第3個星期二)


Day 2

早上:太宰府參道掃街

第二日行程就係去太宰府,當地有著名嘅天滿宮,但當中最具特色係前面嘅參道一條街。林林種種不同商店,可以買紀念品日式傳統餐具、家品之外,仲可以食到唔少特色甜點,包括天山本店「鬼瓦最中」、梅枝餅、豬肉包、明太子、手工仙貝等等。另外一大景點為日本名建築師隈研吾負責嘅太宰府Starbucks店,2千支木條包圍並插於店外,成為獨一無二嘅奇觀。

太宰府一條主要大街,林林種種有不同商店。
由日本名建築師隈研吾負責設計嘅Starbucks。
行程最終點就係天滿宮。


太宰府參道

交通:由福岡乘巴士前往約40分鐘


【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!