去旅行幫朋友買嘢 最憎聽到的5句說話

好多時去去下旅行途中都會收到朋友嘅whatsapp ,離不開就係叫你幫手買呢樣果樣,不過其實幫你買嘢都唔係問題,弊就弊在要求多多,搞到你旅行都要煩多樣野,你又有冇試過叫人幫你買野呢?定係你曾經係受害者?最近有個女網友就發文分享,話係去旅行個陣有朋友要佢幫手買嘢,佢話行李好重,朋友就堅持都要佢幫手買,仲叫佢寄返台灣,有時仲要嫌三嫌四,總知一句講晒就係煩。以下呢五句話可以話係最令人討厭,你又有無講過呢?

1. 唔係有得退稅咩?

聽到呢個問題,係咪好想打佢一鑊呢,正所謂幫你係人情,唔幫你係道理,要幫你買嘢,仲要另外揾時間幫你退稅,唔夠時間幫你退稅仲要俾你話,想點先。

2. 點解個匯率咁貴?

阿姐吖,匯率呢樣嘢,唔係我控制,你問我都幫你唔到嘅,我幫你買嘢,你問我匯率點解咁貴,咁你不如諗清楚啲先決定買唔買啦。

3. ig見你經開幫我買埋呀

作為一個有小小邏輯思考嘅正常人,都應該知道當你ig見到我post 個陣,即係我已經去完啦,如果係周圍都有得買,就可以嘅,但如果唔係,你開到聲其實我咪姐係要重新去多次嗰個地方。

4. 死不心息

最令人討厭嘅係,如果你明明已經say 咗no ,但對方依然死唔斷氣咁chur 你,send攻略呀,又或退而求其次買其他野,總之一定要你買到為止。

5. 遲啲俾返錢你

你買咗先,之後比返錢你呀。每次聽到呢句說話,真係唔知好嬲定好笑,做朋友又唔係唔信你,不過如果開到口要人幫手買嘢,最好就早啲過錢啦,無理由要人地墊支。

相片來源:carmen-art @tumblr