情侶必試「無言旅行法」 4個唔講野都唔尷尬的行程

好多情侶都會覺得一齊得耐,有時兩個人好攰真係未必會想下下都講嘢,但係如果唔講嘢,又驚會製造咗一個錯覺令到大家覺得兩個人好似感情淡咗,尤其旅行日對夜對,有時真係冇咁多嘢講㗎嘛。不過其實冇嘢講都可以係一種約會方法,下次同另一半去旅行不妨嘗試一下「無言約會法」,用以下四種方式去體驗一下非一般嘅感覺。

1. 親親大自然

平時兩個人生活喺香港,約會嘅活動都離不開行街食飯睇戲,傾嘅話題都離不開工作家庭,有時間去旅行嘅話不妨嘗試去選擇進行一啲同大自然有關嘅活動,望住美麗嘅大自然景色,兩個人就算唔講嘢都一樣咁舒服同自在。

2. 鬧市中的寧靜

除咗大自然之外,旅行嘅時候都不妨嘗試吓係鬧市入邊搵一啲可以靜靜欣賞夜景嘅地方,對住美麗嘅星空或者城市景色,夠賞心悅目之餘唔講嘢都夠晒浪漫啦。

3. 博物館之旅

參觀博物館未必係每個人去旅行嘅首選,但同另一半去行博物館不失為一個有趣嘅體驗,兩個人可以享受下寧靜嘅空間,又可以增加對文化藝術或者當地歷史嘅認識,去完旅行之後唔會除咗玩咩都講唔岀。

4. 書店慢活

平時去旅行大家都會好趕,好想去晒所有熱門旅遊景點,其實兩個人去旅行不妨放慢下生活嘅節奏,一齊去書店享受一個寧靜嘅下午,都係另一種浪漫。

pic:headednorth@tumblr