旅程中為自己加分 8個令男友冧爆嘅小秘密

最近網上就有一條短片引起唔少迴響,內容係關於大家另一半身邊好容易會出現嘅「狗公同姣婆」,訪問入面仲有唔少人分享曾經因為呢啲人出現而導致自己同另一半分手,其實感情嘅事係冇得勉強,一個人真係變咗心都控制唔到,不過如果珍惜一段感情,當然亦都要好好維繫唔好等有機心嘅人乘虛而入。今日就等我小編喺度分享去旅行嘅時候能令男友冧爆的8個舉動,快啲學識等身邊嘅小三唔好有機會破壞你哋啦。

1. Kiss and Hug

好多人一齊耐咗,就唔會再好似熱戀期咁經常錫又或者攬對方,不過如果去旅行,記得唔可以偷懶,每朝起身同每晚瞓之前都記得要做足,提升你哋嘅親密度有助維繫感情。

2. 有意見要出聲

老老豆豆,兩個人一齊溝通真係好重要,如果平時係香港忙已經好少有時間溝通,難得去旅行梗係要好好把握機會,簡單如幫手搵路,講下自己想食咩,都唔好忽略。

3. 讚美的重要

兩個人一齊嘅時候,認同感真係好重要,所以去旅行嘅時候,不妨搵多啲機會讚下對方,例如佢係認路王,識得帶你去搵秘景,咁樣會令佢覺得可以照顧到你,滿足男性大男人嘅慾望。

4. 摸丫摸

好多時偷偷嘅肢體接觸會令男人更加依戀你,好似係床到大家各自玩手機,手腳不妨掂下對方,加強親密度,有時一個唔覺意,更會令大家更進一步。

5. 發脾氣解決唔到問題

體諒唔好亂發脾氣可以話係兩個人相處嘅一大重點,例如旅行途中如果出現咩小插曲,唔好一味黑面,要幫手諗下解決方法,如果唔係嘅話,會令對方覺得你公主病好難頂,呢個時候溫柔女人就有危機可乘。

6. 女人也要幽默感

爾偶發揮幽默感 ,可以令你地行程更加精彩,對足幾日幾夜,相信大家都總有無野講嘅時候,間唔中幽默一下,增加趣味,會令大家相處有新鮮感,同時發掘到大家嘅另一面。

7. Secret Language

好多時情侶嘅親密感,係由兩個嘅專屬語言所組成,好似花名或者大家先明白嘅字句,得你地兩個明其他人唔明,就會多咗種莫名嘅親密感,想介入都好難喇。

8. 主動慰勞

去旅行好多時行足全日行到好攰,如果自駕遊亦會好容易頸緊膊痛,呢個時候主動幫對方按摩吓 ,會令對方覺得你體貼,親密度自然up 。

相片來源:surferboianddollbaby @tumblr