【旅行前必讀】出遊小心踩中6大地雷!

每個國家都有自己嘅生活習慣,去旅行嘅時候正正係一個體驗人哋生活嘅好時機!人生路不熟,一個唔小心好容易踩中人哋國家嘅地雷自己都唔知。雖然大家會覺得自己係遊客,犯少少錯都無可厚非,但普遍嘅規矩大家注意返就可以避免摩擦之外,又可以玩得更開心!以下列出6個城市重要規矩,等大家避免踩地雷。

企喺路中間

去旅行大家都會去當地城市嘅地標打卡,影影下出咗路中間阻住人行都唔知。大家記住影還影,盡量企埋一邊,留意路面嘅情況,唔好擋住人行,影響交通。

繁忙時間搭的士

有時唔識路或者想捉緊時間去玩,大家旅行嘅時候都唔會慳交通費而搭的士,但繁忙時間搭的士其實會令路面更加塞車造成反效果。為人為己,繁忙時間搭的士真係要諗清楚呀!

手扶電梯企錯位

喺香港,大家都知手扶電梯嘅潛規則係左行右企,但係唔係每個國家都係咁架,大家去旅行嘅時候可以留意下當地人點做然後跟住就一定冇錯啦!

着錯鞋

大城市有好多景點其實都可以行去,大家記得要著對舒服嘅鞋去玩呀!另外,有啲場合好似高級餐廳咁,係唔比着拖鞋入去架,記得要睇情況著鞋。

唔遵守「先上後落」規則

好多國家嘅交通工具都好似港鐵咁奉行「先上後落」嘅原則,而禮讓必然係禮貌嘅一種,正所謂禮多人不怪,去玩都唔好得意忘形,要記住遵守規則。

餵白鴿

歐洲國家嘅廣場有好多白鴿,而餵白鴿就成為好多遊客嘅浪漫打卡行動。但係,其實一早有專家話餵白鴿對人同白鴿都唔好。除咗會令白鴿失去自己嘅搵食能力,仲有機會將細菌帶比人類。大家記住保護自己,愛惜白鴿,唔好因一時玩樂而造成影響。

@pakutaso