【日本酒店】沖繩宮古島新開3間Resort比併!登山纜車睇海景+浸溫泉

一講到沖繩,大家都想像到陽光與海灘,不過要嘆盡沖繩就一定要去其他離島。其中宮古島可以話係最受歡迎嘅外島,尤如日本上嘅馬爾代夫,上面有多間高級度假村。花多眼亂唔知點揀,今日為大家挑選咗3間,有新有舊,各有特色。快手揀定,因為呢排有唔少航空公司做緊沖繩平機票,把握天氣仲係炎熱,去埋今年最後一個陽光與海灘旅程啦!

最新開業矜貴之選:Shigira Mirage 

宮古島上最大嘅一個酒店群就係Shigira,當中由7間酒店組成,其中最新一間就係開業不久嘅Shigira Mirage!樓高11層,低密度高格調,120間客房其中40間建於小山丘之上,可以飽覽海岸線海景,部分有私人泳池。酒店可以共用Shigira所有公共設施,包括溫泉、水上活動中心等。

舒適度:*****(以5星為滿分)

論豪華度,Shigira Mirage係7間酒店入面排名第二,級數有保證,酒店設施新淨豪華,全為5星級度假村級數。

設施:*****

除咗溫泉及度假村,酒店仲有小型教堂供人結婚行禮之用;亦有沖繩唯一嘅登山纜車吊椅可登上山丘,盡覽海景。

抵住度:****

目前房價約$3,400一晚,當然唔係話好平,不過作為新開豪華Resort,呢個價錢尚可接受。

Hotel Shigira Mirage

預訂:按這裡

.

低調奢華私人海灘:The Rescape

同樣係今年5月先最新開業,The Rescape就走低調奢華路線,離宮古島機場約25分鐘車程,依一個海灘海岸線而建,完全係背山面海,每間房都可以望到海景,甚至近到可以聽住海浪聲入眠。度假村以五官作為主題,務求令住客嘅五官感覺得到提升,裝潢極具日式簡約風。就算連酒店餐廳食材都係全天然食材,加上私人海灘,完全可以同俗世隔離,洗滌心靈!

舒適度:*****(以5星為滿分)

以五官感覺做主題,當然目的要住客由身體至心靈都得到放鬆,一級享受!

設施:***

有室外泳池,亦有私人海灘,Spa都齊全;不過留意酒店無任何水上活動提供,如果特登去沖繩玩水就未必適合。

抵住度:****

最平房價約$2,100一晚連二人早餐,如果加至$2,500就可以住大別墅,有私人泳池! 

The Rescape 

預訂:按這裡

.

全海景環保酒店:Hotel Locus 

以上介紹兩間都係度假村,其實宮古島中心都有酒店。呢間Hotel Locus就相當有名,全海景房,以保護當地環境為大前提,節約能源,除非住客主動提出換床單或清潔,否則酒店盡量少用資源。酒店另一對象係親子旅客,設有兒童遊樂設施,有室內泳池、天台酒吧等,設施完備。

舒適度:****(以5星為滿分)

雖然未及度假村咁豪華,不過同樣乾淨舒服,全海景房間亦係一級享受。

設施:****

基本泳池、酒吧都有之外,亦有大量親子服務,亦包括收費托兒服務,等父母可以出去玩水都唔怕。

抵住度:*****

酒店好抵住,一晚房價$1,000有找。高級房就要貴少少,要$1,200左右,不過就可以3人入住,適合有子女之家。

Hotel Locus

預訂:按這裡


.

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!