東京「最想居住街區」出爐!第一位係吉祥寺?

日本有優質嘅生活環境,好多人都好嚮往係當地居住。要數日本最熱鬧嘅城市,東京一定走唔甩,新宿、池袋呢啲潮流熱鬧嘅區域原來又唔係當地人心目中最想住嘅區域。日本房地産公司HASEKO URBEST早前公布2019年「最想住在東京哪個街區(車站)」排名,排第一嘅竟然係吉祥寺,第二同第三分別係橫濱同大宮,今次就介紹一下呢3個地方,下次Plan行程個陣就得留意下啦!

第三位:大宮

大宮因濃厚藝術氣息而深受日本人喜愛,好多人去東京都會選擇去大宮黎個一天遊!「大宮盆栽美術館」係日本第一座公立嘅盆栽美術館,收藏並展示稱為水石嘅鑒賞石、浮世繪等繪畫作品,館內環境好有仙氣,森女們打卡一流!大宮仲有鐵道博物館照顧一眾鐵路迷嘅需要,完全係體驗歷史同文化嘅好地方。

@bonsai-art-museum

第二位:橫濱

橫濱對好多港人都唔陌生,會去神奈川縣嘅話就一定會去橫濱玩返轉!從東京市區坐JR只需30分鐘車程就可以感受呢個有異國風情嘅海灣。旅客必定唔可以錯過嘅一定係地標海灣大橋,事關係呢度先感受到橫濱海灣嘅獨有景色,附近仲有商店街同美食街等,滿足旅客嘅需求。大人細路都鍾意嘅麵包超人係當地都有博物館,除咗有縮小模型可以睇之外,仲有麵包超人嘅麵包可以食,真係好得意架!

@welcomeyokohama.com

第一位:吉祥寺

吉祥寺距離新宿只係十分鐘車程,因為交通方便,有好多休閒勝地而榮登東京人最理想的居住地嘅榜首!一出車站就係大型商店街Sunroad,仲有大型百貨公司。而東京近郊為人熟悉嘅賞櫻及賞楓勝地「井之頭恩賜公園」,以及宮崎駿粉絲朝聖地「三鷹之森吉卜力美術館」都係吉祥寺附近,去東京嘅大家又點可以錯過?

@gotokyo.com