【煮食神器】一機兩味!粉綠色 BRUNO雪糕機 開箱試玩報告!

新假期 - 飲食

夏天熱辣辣,好想食雪糕降溫!留在家中歎住冷氣DIY雪糕就更爽!近日坊間出了幾部小型家用雪糕機,最新的就是這部煮婦們熱捧的 BRUNO雪糕機 。雖然都是要預先冷藏冰桶的雪糕機,但最特別就是它有雙杯設計,可以一次過整兩款口味的雪糕,份量多啲,味道又多元化啲。究竟好唔好用,即刻試玩!

撰文:ning   攝影:Fion

延伸閱讀:

出前一丁 x 辦館 LOF 10概念店!! 4款新登場丁麵套餐 |銅鑼灣食乜好|

三層高Starbucks 灣仔新開! 拉花+手沖咖啡工作坊 2小時無限任玩任飲!

柔和紛綠色 BRUNO雪糕機

這部 BRUNO雪糕機 比A4紙稍大,雖然不及之前推出的幾款雪糕機的骰,但拿上手都唔覺重。而且機身的粉綠色提升了可愛感,貫徹日本小家電的精緻風格。

連盒子上的雪糕機也印有粉綠色。

整部機的配件一眼睇晒,電動的攪拌主機、倒入雪糕漿的透明膠蓋、兩個攪拌槳,以及兩個雪糕冰桶。機身亦有「Lock」掣,可以鎖實主機、膠蓋及攪拌漿,以免在攪拌的過程中鬆脫。

造型簡約精緻,整完雪糕用來影相呃Like一流。

雙杯設計 一次過整兩款雪糕

坊間的雪糕機,一般都只有一個冰桶,即是每次只可以做一種口味的雪糕,比較單調。這部 BRUNO雪糕機 就有雙杯設計,將兩個冰桶預先冷藏後,就可以同時做兩款口味,好方便。容量大約200ml,相等於2-3球雪糕,雙杯結合的話,就可以兩個人開心share食雪糕。

冰桶有手挽,底部更有六角形凹凸處,鎖緊冰桶,唔怕攪拌時郁來郁去。

另外, BRUNO雪糕機 的直身圓柱冰桶,可以確保雪糕在攪拌的時候,四周受冷平均,增加成功率。

冰桶內膽為鋁質塗層,建議用木匙或膠刮取出雪糕,避免刮花內膽。

即刻試做雪糕!

開完箱,係時候落手試整了。今次就用伯爵茶雪糕和芒果杏仁粒雪糕來做測試。先將冰桶放入冰箱冷藏最少12小時。

將冰桶垂直擺放即可。

將伯爵茶葉、芒果、砂糖、牛奶和鮮忌廉分別拌勻成伯爵茶雪糕漿和芒果雪糕漿。材料記得要夠凍,雪糕才可以攪拌成形,所以最穩陣就是拌好雪糕漿,再冷藏半小時備用。

伯爵茶雪糕材料:
伯爵茶葉 半茶匙、砂糖 2湯匙、牛奶 30毫升、忌廉 100毫升
芒果雪糕材料:
芒果果蓉 80克、砂糖 2湯匙、牛奶 20毫升、忌廉 100毫升

先開機 再倒雪糕漿

這部 BRUNO雪糕機 操作簡易,裝嵌好攪拌主機,蓋於冰桶上就可以整雪糕。唯一要留意的是,製作雪糕時要先開機,待攪拌槳開始郁動後,才由膠蓋上的小孔倒入雪糕材料,否則雪糕漿有機會濺出。另外,倒入雪糕漿時,建議注入至攪拌槳約一半的份量,預留空間讓雪糕凝固脹起。

攪拌槳開始轉動時,慢慢將雪糕漿倒入。

 

小孔設計亦方便在攪拌途中加入其他配料,增加口感。透明膠蓋也可以觀察到雪糕製作的進度。

雪糕開始成形時,就可加其他配料。

成功!雪糕超軟滑!

攪拌大約15-20分鐘後,雪糕就完成了。效果是成功的,加上膠蓋小孔和闊圓冰桶的設計,有足夠空氣拌入雪糕內,出來的口感和軟雪糕相似,很綿滑,微微黏稠。

和坊間雪糕機一樣,雪糕製成後可以即食;但如果要影相呃Like,最好就將雪糕刮下,再雪至硬身,舀出雪糕球形狀,賣相就更靚。

試玩後感:好玩!

以往B仔的小家電向來都不錯,今次這部 BRUNO雪糕機 亦無令人失望。粉綠色設計明顯攻陷煮婦們的少女心;做雪糕的效果頗滿意,基本上只要食譜份量正確、材料夠凍的話,幾乎每次都可以100%成功。

小缺點是機身較其他雪糕機大,需要頗多的空間儲存。雖然價錢比坊間雪糕機貴一半,但BRUNO雪糕機有兩個冰桶,變相都是合理的。

 

BRUNO Dual Ice Cream Maker 雙杯雪糕機
售價:$598
銷售點:Sogo、city’super、全線百老匯、Aeon、二德惠烘焙店、橘子烘焙

 

延伸閱讀:

即叫即製 100%日本用料 觀塘超市 日本人製 玉子燒 專門店 |觀塘食乜好|