獅航空難帶出飛機安全問題 澳洲政府不建議官員乘坐

上月發生嘅印尼獅航空難,導致全機189人全部喪生。呢單嚴重空難目前仍在調查之中,不過好多消息指出,或有關呢架新型號嘅波音飛機有安全隱患,澳洲政府日前仲出聲明,唔建議任何澳洲政府官員乘坐同類型客機!呢架出事客機為波音737 MAX8型號,係波音近年推出標榜用油量少嘅改良客機;呢架機係獅航首架引入嘅同型號機,仲只係飛咗兩個多月,共800幾個鐘,可以話係非常新淨。不過消息指,出事前不時發現呢架機有問題,例如燈光熄滅、引擎有怪聲、航速顯示有問題等。今次獅航空難之後,公司立刻解僱咗安全總監及多位技術人員,因為係佢哋檢測過飛機安全之後先批准起飛,當然要負上責任。不過更多人開始質疑波音呢款飛機係咪有潛在問題。波音MAX款號係近年波音去貨最快嘅飛機,目前已經有近5,000架嘅訂單,包括亞洲地區就有近500架。萬一真係有安全問題,影嚮極大,希望當局盡快搵到原因啦!

呢架出事客機為波音737 MAX8型號,係波音近年推出,標榜用油量少。

導致全機189人全部喪生,為印尼史上最嚴重空難。

獅航當初引入波音737 MAX8時,仲表示非常榮幸。

相關文章:

酒店張床特別舒服?4個隱藏秘密令旅客加倍好眠

【好地方】合舍 從下而上的藝術空間實驗

一齊搭車行街食飯 人寵共融的瑞士

【立即讚好】全新 Yahoo 旅遊 Facebook 專頁
Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!