一生人一次的機會 !10美元換加勒比海豪華度假村?

如果問大家用10美元可以做到啲咩,可能大家會覺得只係一餐飯嘅價錢,如果話俾大家聽用10美元可以買到一座喺加勒比海嘅豪華渡假村,但條件係要放低香港嘅一切飛去個邊照顧同打理呢個度假村,大家又願唔願意呢?

唔係講笑,卡薩卡考科考生態探險旅館(Casa Cayuco Eco Adventure Lodge)嘅美國主人,分別係35歲同33歲嘅Dave同Suzanne,正計劃出讓佢哋係巴拿馬博卡斯德爾托羅(Bocas del Toro)建立嘅Casa Cayuco,不過佢哋就唔係以價高者得嘅方式出售,而係以賣奬券嘅方式舉行一個抽奬活動,一張奬券就承惠10美元。

可能大家聽到都會覺得難以置信, 不過對於呢對夫婦嚟講,Casa Cayuco有着與別不同嘅意義。喺五年前,Dave同Suzanne決定唔再跟隨約定俗成嘅人生方向進發,佢地上網搵到Casa Cayuco正開放出售,於是將家當變賣,放棄美國嘅企業工作,帶着七個行李喼嚟到呢一個地方,重新開始。一開始嘅時候,島上面由於脫離電網嘅範圍,所以每晚只有大概幾個鐘頭可以依靠發電機供電,面對着同大城市完全唔同嘅生活環境,Dave同Suzanne憑着自己嘅努力將Casa Cayuco大力改造成生態探險旅館,吸引越來越多嘅遊客。

參與今次幸運抽奬嘅贏家會獲得擁有24個床位嘅渡假村,包括四個獨立小屋,一間主人小屋,兩間小屋套房同一間空調豪華套房,依家嘅Casa Cayuco已經擁有自己嘅碼頭同由茅草覆蓋嘅陽光露台,仲有廚房,通訊塔,洗衣房同三條長23英尺嘅動力船。

不過對於呢一個幸運抽奬嘅贏家,Dave同Suzanne都有佢哋嘅堅持,佢哋希望新嘅主人可以繼續僱用現有嘅14名土著,同時繼續建設同維護度假村嘅生態。

至於Dave 同Susan?佢哋就決定帶着個女Mina 展開新一輪嘅冒險之旅,佢哋希望可以搵到一個相類似嘅環境同地方開發佢哋嘅新事業,如果大家都想改變一下現狀,不妨買返張奬券碰吓運氣都好 ,不過前提係,你係咪準備好放低香港嘅一切?

Casa Cayuco奬券售賣: https://winthis.life/index.aspx

用$10美金可以換到一座咁靚嘅度假村,但要你放低而家有嘅一切,又肯唔肯呢?

Dave同Suzanne用咗五年時間將呢個渡假村打造成受歡迎嘅旅館。

Dave同Suzanne用行動提醒大家,只要有心永遠都唔怕遲。

all from Magnus News Agency

相關文章

未有櫻花睇梅花 日本5大最靚賞梅熱點

每日IG - 紐約街頭大改造!坑渠蓋也是藝術品

世界第一!中國去年人均外遊次數3.7次

【立即讚好】全新 Yahoo 旅遊 Facebook 專頁
Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!