編輯實試5大拉麵!最鹹豬骨湯 VS 鮮味蝦湯

Cosmopolitan.com.hk

細個睇電視廣告,淨係識得味千拉麵,當時跟媽咪食開十幾蚊嘅車仔麵,一碗拉麵幾十蚊,已經覺得好貴。點知20幾後嘅今日,一碗拉麵係好可以去到過100蚊碗,都依然大有捧場客,咁前題當然係要好味。依家日式拉麵愈開愈多,神級嘅有一蘭同豚王(神級係因為小編自己覺得好好味),其他嘢又有米芝蓮加持、又有唔同味嘅湯底,不過間間都話自己好味唔通真係間間都好味咩?依家小編就想講下其中5間拉麵店,價錢由80、90蚊到過百一碗都有,買得咁貴嘅,究竟邊間抵佢賺,邊間唔抵食!

▲ Cosmopolitan.com.hk

1. 一幻拉麵

以前香港嘅拉麵店多數係濃骨豚骨湯,搞到人以為豚骨湯拉麵係個must,咁人大咗唔賣樓去多幾次日本,就知拉麵嘅種類係可以好多,近年都多咗好多主打唔同味湯低嘅拉麵進軍香港。來自北海道札幌嘅一幻拉麵,主打甜蝦湯底,有得揀鹽味、味噌同醬油,如果你真係勁鍾意豚骨,佢都有得on top加豚骨湯嘅。

小編差唔多次次去灣仔都會食佢,咩味都試晒,最推介佢嘅原味加鹽味,因為鹽味比較清淡,突出到蝦湯嘅鮮甜,咁本身佢嘅蝦湯都蝦味濃郁,好好飲。麵都算彈牙,叉燒夠薄夠嫩,好好食,$88一碗真心合理!

推介度:★ ★ ★ ★(5星為最高)

▲ Cosmopolitan.com.hk

2. 麵屋一燈

連續5年獲選成東京第一拉麵嘅過江龍,試業嗰陣排隊排到傻,咁小編梗係冇排喇,等啲人熱情過咗唔使排隊先去食,幾醒!

▲ Cosmopolitan.com.hk

試咗佢嘅濃厚魚介拉麵同柚子拉麵,之前試過另一間嘅魚介湯超級咁鹽,但麵屋一燈唔太鹹,啱啱好,好飲,而且塊雞肉好結實,雞味濃郁。不過個柚子就差少少,柚子味同個湯嘅味好似分開咗咁,唔係好match,一般般。推介魚介湯!

推介度:★ ★ ★ ★(5星為最高)

▲ Cosmopolitan.com.hk

3. 立体派

兩位嚟自日本大阪嘅拉麵大師林隆臣及松村貴大創立嘅拉麵品牌,試咗佢哋嘅招牌「特級白湯」,白湯拉麵搭配三大片低溫慢煮日式叉燒及半隻流心蛋。湯底以日本米鴨丶京都丹波地雞及籠目昆布精製而成,飲落唔好話唔重口味,係咩味都飲唔到,聞就好香,但得好淡淡嘅雞味,有啲似阿媽煲嘅湯,冇乜特色。

不過,麵嘅粗幼適中,好彈牙,真心好好味,而且個慢煮叉燒勁入味,係小編喺拉麵店食過最好味嘅叉燒呀,加番唔少分!

推介度:★ ★ ★ (5星為最高)

▲ Cosmopolitan.com.hk

4. 霸嗎拉麵

廣島規模最大嘅拉麵連鎖店,號稱「最強濃厚豚骨No.1湯底」,之前見到好多人排隊,所以有次行過見到唔使排隊即刻試下先!佢有濃厚豚骨湯同雞白湯揀,同朋友一人揀一個,試晒兩款。其實小編都已經係食到好重口味嘅人,但佢嘅湯係鹹到不得了!!!!!鹹到遮蓋晒其他味!!!!!將「最強濃厚豚骨」改做「最鹹濃厚豚骨」就啱喇!

麵係直身嘅幼麵,口感一般,唔算好彈牙,個叉燒油得嚟有啲乾,都係好一般。所以總括嚟講,好一般!

推介度:★ ★(5星為最高)

PHOTO CREDIT: ig @growing_boy

▲ Cosmopolitan.com.hk

5. ラーメン松壱家(松壹家)

如果你鍾意重口味,佢絕對啱你!佢有幾種湯底可以揀,醬油豬骨、味噌豬骨、鹽味豬骨、黑豬骨、終極雞湯。小編試過鹽味豬骨同終極雞湯,兩款嘅味道非常之濃郁,豬有豬味,雞有雞味,好輕易就可以飲成碟湯,正到爆!

麵係扁平嘅太麵,好彈牙,叉燒好入味,不過就肥肉比較多,對女仔就講係有啲驚嘅,但係又真係同個湯好夾喎,只係食完真係好有罪惡感啫。

推介度:★ ★ ★★(5星為最高)

PHOTO CREDIT: ig @hongkongramen

推薦閱讀:

他總是忘不掉愛過的她!男人忘不了前度的4大表現

新一年搞得開心!4招小情趣為做愛加點新意

李專:一個人對你好從來不是義務,所以請珍惜這種幸福,別視為理所當然



Follow us on:

  • Facebook: CosmoHK
  • Instagram: @cosmopolitan_hk
  • YouTube: CosmopolitanHK