【送豬迎鼠】本週末搶閘登場 本地年宵市集逐個捉

下星期就係農曆新年,不知不覺又過一年喇!每年新年之前大家都一定會行宵,辦年貨、買年花、買得意產品,今年雖然無咗最大型嘅維園年宵,不過其實喺香港唔同地方都有各種小規模年宵市集,而且別具特色,好多都係針對固定族群。今日為大家介紹下呢個周末就會開始嘅幾個年宵市集,大家揀啱心水就可以出動辦年貨!

環保走塑年宵@西環

港島區無咗維園大型年宵,但有嘅係各區自家年宵,反而更令街坊行得方便!一班新上任嘅中西區區議員,就於西營盤第二街至高街,辦起一個主張環保無塑消費嘅市集「山城年宵」。參加擺擋都係當區居民、學生;除咗有環保手作產品賣之外,仲有環保節日工作坊、文藝表演等,中西區區民,唔好錯過呢!

由一眾新上任中西區區議員合辦,主打環保走塑。

山城年宵

地點:西營盤第二街至高街

日期:1月18日至19日

時間:2PM至6PM

綠色年宵舊物重用@荃灣

同樣主張環保嘅,仲有荃灣呢個「綠色年宵2020」,位於沙咀道嘅綠色年宵今年已經係第三年舉辦,所謂綠色市集,其實擺賣嘅一樣有乾濕貨,不過同時會有人教大家新年減廢資訊,又有義工於年集進行回收及派發重用利是封及環保袋;而市集中所有帳篷、傢私、貨架等,完咗之後都會回收留待下次重用,唔會直接進入堆填區呢。

由環保署、環保觸覺等機構合辦,極有意義。

綠色年宵2020

地點:荃灣沙咀道

日期:1月19日至25日

時間:中午開始至約凌晨

小朋友擺檔@屯門

年宵市集唔一定只係大人可以擺,原來小朋友一樣有機會做檔主!由「百好繪本士多」及「綠腳丫」合辦,位於屯門藍地就係專門由小朋友擺檔嘅年宵,每檔都由小朋友自己決定擺賣咩貨品,亦會由小朋友設計嘅遊戲攤位,對象亦當然係小朋友啦!另外場地仲有如意揮春印刷,同埋好多繪本特價發售!

主打小朋友,由小朋友擺檔嘅迷你年宵,大人細路都要去喇!

百好迷你年宵

地點:屯門藍地大街

日期:1月18日

時間:2PM至5PM

寵物年宵@觀塘

有小朋友年宵,當然亦有毛孩年宵啦!觀塘呢個由孖寶媽辦嘅「生機勃勃年宵市集」,主要係擺賣為毛孩而設嘅產品,包括健康補品、寵物用品等,同場仲有唔少講座,例如專家教授寵物精油療法、健康飲食等;另外都有其他活動,例如占星、塔羅、美容、瘦身等攤位呢。

主打寵物嘅年宵,為家中主子謀福利喇!

生機勃勃年宵市集

地點:觀塘開源道60號駱駝漆大廈3座8樓Q室

日期:1月18日

時間:12NN至5:30PM


【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!