隨時年紀增長 閨蜜們的旅行方式有所改變

新一年話咁快又已經過咗兩個月,唔知大家係工作上要努力搏殺嘅同時,又係咪都已經開始咗籌備今年嘅旅行大計呢。對於一眾女士來講,梗係唔少得同一班閨蜜安排一個年度嘅共同旅行,等大家可以好好放鬆休息一下。不過隨着大家出嚟做嘢嘅年期越嚟越長,就連去係旅行嘅習慣都開始有改變,就好似以下呢幾點,大家又認唔認同呢?!

1. 慎選酒店及機票

以前只要夾到時間又有假,再差嘅廉航都一定會頂得順,為咗慳錢住Hostel就梗係唔少得。而家?就情願比貴少少都要住好啲坐好啲,心態上會覺得放假就要對自己好啲,

2.「旅遊」時間直線下降

以前去旅行仲趕過返工,唔單止一日走四五個景點,仲要晏睡早起,宵夜完落夜場先肯返酒店瞓。而家為咗養生,就算玩得唔係好攰都會早D訓,然後自然醒,寧願去少啲地方都唔想咁趕。

3. 慢活為主調

以前行程一個接一個走馬看花,基本上每去一個景點打完卡,行一行,就即刻走。但係依家就唔志在去一啲所謂嘅地標建築景點,就算簡單如一間Cafe都可以坐足兩粒鐘,放慢腳步旅行,享受下隨心嘅樂趣。

4. 飲食不再求其

以前係外地食咩嘅選擇空間好大,掃街平平地又得,買返酒店食都得,就算趕唔切一餐半餐食唔切都冇所謂。依家食三餐都會講求質素,而且盡量想平衡健康同味道,最好就有埋個靚景就更加好。

pic: sexymotorslifestyle@tumblr