【飛機瞓好覺】長途機大忌!5大方法解救眼光光坐天光

坐飛機雖然可以睇戲打發時間,但坐得耐好易攰,大家都會係飛機上補眠。不過好多人係飛機都會瞓唔著,長途機就更加難頂,眼光光十幾個鐘又冇野做真係好難頂。不過唔使驚,大家睇左以下5大入睡秘訣,或者可以幫到大家係飛機瞓個好覺!

1.揀個好位

座位位置應該係最影睡眠質素的關鍵,建議大家可以揀窗口位,唔會俾人嘈到之餘又可以自己調較遮光板。有得揀的話記得要避免坐最後一排,位置冇得打斜之外仲要近廁所,好易俾人嘈醒。

2.減少行李量

如果有多過一個行李,空姐會要求大家放係前面座位下面。如果放得太多野隨時會影響自己腳部伸展空間,想瞓得舒服啲就唔好帶咁多野上機喇。

3.自備被同枕頭

有被同枕頭就自然更似係自己張床喇,咁一定可以瞓好啲。雖然飛機會有提供,不過考慮到衛生問題,大家可以考慮下自備,咁就瞓得安心又放心喇!

4.遠離光源屏幕

係一個較黑暗的環境一定可以幫助大家入眠,瞓之前可以熄左電視屏幕或者係上方的閲讀燈,有太陽就用遮光板遮一遮,再用埋眼罩就更容易瞓著。

5.減少咖啡因

坐飛機個陣味覺一般較遲鈍,空姐推過飲品車,聞到咖啡香又真係想飲返杯,但如果瞓唔著真係要忍住喇,飲得太多咖啡因落肚會更易眼光光架!

(FLY_0I9A2937_TP_V@pakutaso)