【2019台灣景點】出走宜蘭行程推介!睇鹿仔+住超靚夜景民宿

宜蘭係台北後花園,對於香港人嚟講,可能只係知道礁溪溫泉,通常去宜蘭都係住一晚溫泉酒店就走;錯喇,其實宜蘭氣候好,長期有太陽(雖然一有颱風就食到正),背山面海山明水秀;對於台灣人嚟講又點止浸溫泉咁簡單?今次介紹大家台灣人先知嘅兩日行程,大家去台北玩之餘,抽返一日半時間去宜蘭玩下啦!

Day 1

早上:乘鐵路前往宜蘭 

早上大家可以前往台北車站,每日有大量列車前往宜蘭站,車程只約1小時; 另外市政府、台北轉運站、板橋轉運站都有巴士前往,約1.5小時。

中午:網紅推介文青民宿 

話說近年台北有一間超紅文青甜品「藍氣球 有點法式的手工點心舖」,每日大排長龍,去年就東移去到宜蘭,不過唔只賣法式甜品,係開民宿!呢間就係「藍氣球 有點想像的美好小露台」走嘅都係法式文青風,即時成為網紅爭相前往嘅打卡點!民宿四面環田,主要用石材建築,而且佈滿綠色植物,大量落地玻璃採天然光。雖然係民宿,但都有24小時管家服務,唔怕有問題無人幫;民宿有共用空間包括Playroom、廚房、飯廳,更有一個戶外露天空間。另外民宿有單車免費提供。不過民宿始終唔大,只有3間房,可以租一間,或者整棟包起都得,情侶或家庭旅行都可以呢!

藍氣球 有點想像的美好小露台

地址:宜蘭五結鄉大吉村三吉中路52巷15弄30號 

預訂:按這裡

夜晚:最新開業 百萬夜景

宜蘭背山面海,景色當然絕美,不過原來夜景先係台灣人嘅最愛,所以宜蘭又被台灣人稱為「百萬夜景」!講起夜景,大家都會推介今年4月先開業嘅「空ㄟ農場」,位於礁溪市區山上,可以直接望到龜山島、烏石港、蘭陽平原等。呢度其實前身係「空ㄟ咖啡」,採用工業風,主打粗獷美學,大部分都係露天座位,可以邊食邊睇靚景。不過唔好以為呢度係「食環境」,其實餐廳嘅Pizza係極有水準,老闆曾經遠赴意大利取經,一啲都唔馬虎呢。

空ㄟ農場

地址:宜蘭礁溪鄉白石腳路157巷31號

營業時間:3PM至10PM

預約:按這裡

Day 2:

早上至下午:小奈良 新開鹿仔樂園

台中大家都知有牧場可以玩羊仔,但大家未必知今年先開業嘅宜蘭斑比山丘,係有大量小鹿可以同大家親近呢!呢度就話明要建造一個「小奈良」,大家可以入嚟餵小鹿、同小鹿互動,仲有超靚咖啡店、紀念品店,售賣嘅都係同小鹿有關喺飾品、美食;雖然話係「小奈良」,不過大家唔使太擔心啲鹿會好似奈良咁激動,由於新開不久,鹿仔未變到好攻擊性,反而小朋友都可以輕鬆餵飼,絕對唔需要擔心!建議大家預留大半日,早上玩下鹿仔,下午於咖啡店食個簡餐再逛下紀念品。

斑比山丘

地址:宜蘭冬山鄉得安村下湖路285號

營業時間:10AM至5PM

門票:成人200台幣、小童50台幣 

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!