【繡球花季開催】 三大台灣賞繡球花熱點 陽明山+泰山打卡花海

6月啦,又到咗一年一度嘅繡球花季節,除了日本,台灣一樣可以睇到超夢幻的繡球花!雖然6月成日落雨,的確令人好掃興。但依個季節可以比你望到一大片色彩繽粉嘅繡球花海,相信鐘意花嘅你都唔會介意咁多!以下我們精選咗3個台灣賞繡球花景點,等你們可以過一個「繡球花假期」。

大賞園繡球花

 

「台北後花園」陽明山出晒名睇花,每季都盛產不同種類嘅花。呢到嘅繡球花同樣顏色多樣,每一個都咁有睇頭!而頂湖嘅大賞園繡球花園面積雖然唔大,但係勝在人流較少,花園的環境仲可以話係無得輸!園區其中一個特色,就係花海後面有個煙霧繚繞嘅小油坑,將自然景觀同繡球花混合,別具一番風味!不過,要入去賞花嘅你們記得事前睇清楚時刻表,因為呢到嘅接駁公車唔多,撞正花季更有人流管制,可能要等好耐先上到山!

地址:台北市北投區竹子湖路67-7號(頂湖)

開放時間:07:00-18:00 (依店家不同)

(官方FB)

雪霸休閒農場

位於新竹五峰鄉嘅雪霸休閒農場,位於海拔1900多公尺,天氣涼爽之餘,特殊嘅地理環境令種出黎嘅繡球花仲特別大個添!由於呢到海拔高,所以雲霧漂渺,影出黎嘅相仲會有夢幻嘅感覺,就好似入咗仙境咁!農場更設有咖啡館,比你一邊嘆住咖啡,一邊將一片繡球花海盡收眼底,特別寫意!

地址:新竹縣五峰鄉桃山村民石380號

開放時間:自由參觀,不受開放時間影響

(官方FB)

泰山黎明步道公園

 

如果想睇繡球花,又唔想花時間去偏遠嘅地方,依個公園真係極力推介!雖然呢到嘅繡球花數量唔多,無滿山滿谷嘅感覺,但賞花道全部都係石鋪嘅平路,一個個色彩繽紛嘅繡球花就係你嘅兩旁盛開,行起上黎輕鬆舒服,最啱一家大細去! 雖然公園位於市區, 同樣有一種遠離繁囂嘅感覺。

地址:新北市泰山區泰林路二段542巷

開放時間:自由參觀

(FB@洪橘子)

能夠與一大片嘅繡球花海拍照,真係好幸福!但即使它們幾賞心悅目都好,千期唔好多手採摘,否則其他人就無辨法欣賞同一景象!