【暑假出遊】上海3大新酒店比拼 性價比高+奢華豪住之選!

夜明珠上海係大陸最國際化嘅城市,唔少食喝玩樂好地方;當中有唔少都係由外國集團管理嘅公司,當然酒店業係其中一樣必爭之地,唔少國際集團都紛紛插旗。咁多靚酒店去選擇,大家可能花多眼亂,不如睇下我哋介紹以下三間新酒店,各有特色,優點缺點一次過畀晒你哋睇,自己揀啱心水,暑期旺季及早Book定喇!

名人撐場:The Shanghai EDITION 

上海唔同北京,奢華之中帶點低調同埋精緻,好似呢間由美國EDITION集團新開嘅上海分店,就係走精品路線。一向EDITION係走新舊融合嘅風格,酒店翻新咗兩棟舊建築,貫以Modern及個性化風格,打咭位之多,連大台嘅「胡說八道會」一眾女星都入住過,仲貼過唔少相;另外連日本球星中田英壽都住過,咁多名人撐場,唔怪得瞬間成為城中焦點!

舒適度:****(5星為滿分)

酒店以暖色系為主題,令人倍感家的感覺,唔似一般五星級酒店;加上客房空間大,非常舒服!

設施:****

酒店最大賣點係天台RoofTop酒吧,露天設計可以直接飽覽黃埔江美景,每逢夜晚就會爆晒場!

抵玩度:***

暑假旺季入住約2千頭一晚,如果計酒店嚟講就唔算太平,不過上海嘅物價比起大陸其他城市貴一截,都係預咗。

The Shanghai EDITION

預約:按這裡

奢華首選:BVLGARI Hotel 

如果覺得上面呢間未夠豪華,咁就一定要揀BVLGARI喇!作為世界最著名嘅珠寶品牌之一,相信無人不識,自從染指酒店業之後,都係以豪華作為招徠。上海BVLGARI為最新分店,亦係集團嘅第六間分店,為於外灘旁,大部分客房可以望到外灘江景。酒店亦有24小時貼身管家服務,每間房都會派一位專人跟足你入住全程,住客可以隨時搵佢處理大小事務,包括行程安排都得。

舒適度:*****(5星為滿分)

酒店以復古作為設計特色,係融合上世紀舊上海風味,加現代設計,住得舒適之餘亦有格調,絕非土豪。 

設施:****

酒店位於最高層嘅餐廳四面有落地玻璃,光感十足,而且可以望正外灘,難怪無論午餐、下午茶同晚餐都長期爆滿,要及早訂位!

抵玩度:***

暑假旺季入住約4千一晚,相對係屬於高價位酒店,適合想豪一次嘅朋友。

The BVLGARI Shanghai

預訂:按這裡 

泰國過江龍:The Sukhothai Shanghai

講起酒店,相信大家都會覺得泰國嘅酒店可選係首屈一指,無論軟件定硬件都發展得非常成熟。上海呢一間Sukhothai就係泰國著名酒店品牌,而呢間係佢哋衝出泰國嘅第一間海外分店,當然唔會做衰自己個名啦。由泰國名設計師Neri & Hu設計,用上工業風作為主格調,而設計以簡約為主,一貫泰國嘅舒適風格。

舒適度:***1/2(5星為滿分)

酒店保持泰國風,即係簡約舒適為主,唔似得上面兩間咁奢華,但都一定住得舒服。

設施:****

酒店有米芝蓮大廚作為客席廚師,另外幾間餐廳同酒吧都好有質素,好多人唔係住呢度但都專誠前來食飯。

抵玩度:*****

暑假旺季入住約$1,500一晚,可以話係性價比最高,不過當然上海價錢無得同泰國比啦。

The Sukhothai Shanghai

預訂:按這裡

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!